الراجل ده عمل حركة في منتهى الذكاء والدهاء تخيلوا رقص الناس كلها وفي الآخر جاب حتة جول يتحسب سوبر هاتريك يعني مش جول واحد وجابه في الزاوية البعيدة في المقص الشمال يعني يا أهلاوي اقعد حط رِجل على رِجل وارفع راسك فوق وقول بأعلى صوت أنا عندي مجلس إدارة محترم وعندي رئيس نادي لسة بيجيب أجوال كمان و أجواله حراقة وبتوجع كمان من أسبوع بالظبط كان بيدي مهلة اسبوع لفايلر علشان يحدد موقفه وطبعاً بالعين الخبيرة والرؤية الثاقبة عرف إن فايلر بيراوغ وبيماطل وعاوز يملي شروطه وممكن في الآخر كمان مايوافقش ويمشي
طيب نقعد كدة حاطين أيدينا على خدنا مستنيين فايلر يتعطف ويتكرم علينا طبعا لا احنا محدش يلوي دراعنا الخطيب من خمس أيام بالظبط ارسل تهنئة لصن داونز لأنه أحرز الثلاثية دوري و كأس وكأس الرابطة
ساعتها الخبر ما عداش عليا كدة عادي قلت في نفسي طيب يمكن قصده علشان سيرينو مهاجم صن داونز بس الكبير كبير يا جماعة الكبير كان عينه على مدرب صن داونز و التفاوض معاه اتعرض اولا على رئيس صن داونز نفسه يعني مش نتفاوض مع المدرب ومالناش دعوة بادارته فعلا باحترافية وشياكة وفي منتهى السرية تمت المهمة بنجاح لدرجة إن مفيش حد كان متأكد أن موسيماني هو المدير الفني للأهلي الجديد إلا قبل ما يوصل بيوم واحد يعني بجد سوبر هاتريك في الإدارة 💪🦅❤️
نيجي لسوبر هاتريك بتاع بيبو في اختياره لموسيماني تحديداً
موسيماني بيعشق النادي الأهلي و ده معروف للجميع عارف لما حد يحب المكان اللي جاي ليه يبقى نفسه حلو في الشغل بتاعه
موسيماني معجون في أفريقيا وعارف خباياها
موسيماني دارس الأهلي والوداد والرجاء والزمالك بحكم أنه كان بيلعب قصادهم
موسيماني مذاكر الأهلي عن ظهر قلب يعني إن شاء الله يمسك الفرقة على طول لا فترة تعارف ولا بتاع
موسيماني معاه معد بدني الله أكبر عليه شكله أساسا مرعب في الصورة 😂 يارب إن شاء الله يعمل أحلى شغل مع اللاعيبة
ميشيل يانكون مدرب حراس المرمى حتة إن بيبو يتمسك به إنه يقعد و ميشيل نفسه وافق وأظهر رغبة شديدة لوجوده في الأهلي دي برضه خطوة بمعلمة
في الآخر ندعي كلنا لكابتن بيبو ربنا يشفيه ويعافيه وينصره على مين يعاديه ويحفظه من كل سوء❤️❤️
تعليقات
إرسال تعليق